GERİYƏ
Tural Yusifov
Bu şəkilə diqqətlə baxın. Bura Bakıxanov prospekti, 60 saylı məktəbin yanıdır. Daim tıxaclı və ləng hərəkətli yoldur. Oranın ləng olmasının səbəbi isə bu cür sürücülərdir. Birinci və ikinci sıra ilə kifayətlənməyib, artıq yolu bağlayıb və məktəbdən uşaq götürməyə gediblər. Bu adamın bu qabiliyyətlə uşağa verəcəyi tərbiyə nə olacaq axı ?
çərşənbə axşamı, 21 may 2019
Eqoizmin 100-cü mərhələsini uğurla adlayan bu sürücülər , evinə, işinə, elə dərsinə tələsən insanları fikirləşmirlər. Bu adamların yeganə alibisi “Bəs harada saxlayım?”-dır. Sən harada saxlayacağını bilmirsənsə, avtomobil alma və sürmə. Sən harada saxlayacağını bilmirsənsə, sənə görə yüzlərlə şəxs yolun ortasında qalmalı deyillər. Sən harada saxlayacağını bilmirsənsə özünə naviqator al və yaxın parkinqləri nəzərdən keçirt. Bu yola yaxın düz 5 parkinq var. Və saatı da 1 manatdır. “Pulum yoxdur” demək bəhanədən başqa bir şey deyil. Avtomobuili olan və ona yanacaq tökənin yüz faiz 1 manatı var. Sadəcə bu adamlar özlərinə əziyyət verib 100-200 metr məsafəni ayaqla qət etmək istəmirlər. İstədikləri bir şey var : Imkan varsa düz partanın yanında saxlasınlar. Bəs necə olur ki, bu cür düşüncəsiz şəxslər yetişir ?
Qatıldığını deyə bilmərəm , amma sağlam qidalanmağın burada rolu var. Menüsunda qoyun əti çoxluq təşkil edirsə, daim yağlı yeyib, siqaret çəkib, fiziki aktivliyi aşağıdırsa, demək oksigeni bol qəbul etmir. Oksigen bol qəbul edilmirsə, beyinə siqnal getmir. Beyinə siqnal getmirsə, o zaman qərar verməkdə çətinlik çəkir. Qərar verməkdə çətinlik çəkirsə, düşüncədən əlildir. Əli ayağı yerində, görür və danışır, hiss edir, amma beyindən, düşüncədən əlildir.
Bunun rüşvətə aidiyyatı yoxdur. Guya “ağıllı” insan anlamır ki, belə saxlamaq olmaz ? Normal düşüncəsi olan şəxs guya biulmir ki, mən belə saxlasam heç kim keçə bilməyəcək ? Çox gözəl anlayır və bilir. Sadəcə saymır və vecinə almır.
Şəxsin özü, DYP və BNA. Bu şəxs və şəxslər cəzasız qaldıqlarına görə bu addımı atırlar. Artıq öyrəşiblər. Balaca, ərköyün evin sonbeşik uşaqları kimi. Qanunu saymaq belə istəmirlər. Çünki qanunun tələblərini qorumalı olan orqanlar buna fikir vermir və mübarizə aparmırlar. Bundan öncə parklanma qaydalarının pozulmasına görə cəzaların verilməsi DYP-də idi. Belə problem yox idi ? Əlbəttə var idi. BNA gəldi nə dəyişdi ? Əgər biz hələ də belə fotolar paylaşırıqsa, demək heç nə dəyişməyib. Yenə eyni vəziyyət Babək pr-i Babək plaza-nın qarşısında, elə həmin yeri keçən kimi körpünün altında, Şərifzadə “Asan” xidmət, H.Əliyev küçəsi “Asan” xidmətin qarşısında, Nobel pr-i “Asan” xidmət (heç də asan olmadı), Xəqani, Nizami küçələrində, Gənclik Mall-ın, 28 Mall-ın qarşısında, axşamlar Neftçilər pr-də başdan-başa davam edir. DYP-də də belə idi, BNA -da da. Bəli, kimlərəsə cərimə yazılır, amma bu qeyri-effektivdir. Çünki lazım olan sayda və yerdə deyil.
Necə olur ki, “Avropa oyunları”, “islam həmrəylik oyunları” və digər beynəlxalq əhəmiyyətli tədbirlərdə bu problem olmur ? Heç kim belə saxlamır və bütün maşınlara da yer tapılır. Möcüzədirmi ?
Xeyr. Sadəcə qanunun tələblərinə riayət olunması sərt şəkildə tələb edilir. Hır gün axşam saat 8-dən sonra Neftçilər pr-i başdan ayağa parkinqə çevrilir. Qəribədir. Gündüz vaxtı o cür formada maşınını saxlasan, gəlib səni maşın qarşıq apararlar. Axşamlar isə sanki hamının gözü tutulur. Halbuki, Azadlıq meydanının altında 2 mərtəbəli parkinq var və prospekt boyu yerləşdirilən bütün maşınlar oraya yerləşəcək. Saatı 50 qəpikdir. Çay dəstgahına 50 manat verənlər 50 qəpik verməkdən çəkinirlər.
Parkinq mıəsələsi BNA veriləndən , DYP çəkilib oturub kənarda. Dövlət tədbirlərini çıxmaq şərti ilə, gözünün qarçşısında baş verən dayanma və durma qaydalarının pozulmasına göz yumur. Dedikləri bir söz var : “Bizim səlahiyyətimizdə deyil”.
Düzdür, YPX isnpektoru ona görə cərimə yaza bilməz, amma onu uzaqlaşdıra bilər. Bu arada, YPX haqqında təlimatda yazılıb :
Bu cür sürücülər yol hərəkəti təhlükəsizlik qaydalarını pozurmu ? Pozur. Yolu kəsib və qəzaya şərtait yaradır. Çünki onu yandan keçmək sitəyən elə arxadakı avtobus, körpünün üzəri ilə gələn nəqliyyat vasitəsi ilə toqquşa bilər. Yol hərəkəti iflic olub. Tənzimləmək lazımdırmı ? Əlbəttə lazımdır və etməlidir də. Yol hərəkəti iştirakçısının hüququ pozulurmu ? Pozulur. Çünki A nöqtəsindən B nöqtəsinə kimi rahat, sərbəst və təhlükəsiz gedə bilmir. Və DYP-nin cərimə yaza bilməməyi buna dəlalət etmir ki, yolu kəsib dayanmalıdırlar. Və mənə elə gəlir ki, sanki DYP parkinqlərə nəzarər BNA-ya veriləndən “ay-hay nəzarət etdin” deyib və kənara çəkilərək bu işin necə nəticələnəcəyini gözləyir. Məncə bu mübarizə birlikdə aparılmalı idi.
BNA isə hələ müəyyən ərazilərə kamera qoymaq üçün kameranın gəlməyini gözləyir. Sual yaranır:
Bəs sizcə niyə belədir ?
