Nəqliyyat vasitələrinin dayandırılması üçün əsaslar

Bir şəxsin saxlanılıb məsuliyyətə cəlb edilməsi üçün səbəb olmalıdır. Yol Patrul Xidməti haqqında Təlimatın 7.4-cü bəndinə əsasən, nəqliyyat vasitələrinin dayandırılması üçün aşağıdakı əsaslar müəyyən edilib:

  1. Nəqliyyat vasitəsini idarə edən şəxs tərəfindən yol hərəkəti qaydalarının və ya yol hərəkəti təhlükəsizliyinin təmin edilməsi qaydalarının pozulması vizual şəkildə aşkar edildikdə.

  2. Qayda pozuntusu xüsusi texniki vasitələrin köməyi ilə müəyyən edildikdə.

  3. Nəqliyyat vasitəsini idarə edən şəxs tərəfindən inzibati xətanın törədilməsi barədə digər DYP əməkdaşı tərəfindən radio-cihaz vasitəsilə məlumat daxil olduqda.

Göründüyü kimi, əgər qayda pozuntusu baş veribsə və bu, YPX inspektoru tərəfindən vizual şəkildə aşkar edilibsə, sürücünün saxlanılması qanunidir. Ərazidə kameraların olub-olmaması bu halda əhəmiyyət daşımır.

YPX əməkdaşının piyada xidməti zamanı tətbiq etdiyi qaydalar

Əgər YPX inspektoru piyada xidmət aparırsa, nəqliyyat vasitəsini dayandırmaq üçün:

  • Fit və ya jezllə işarə verir.
  • Patrul avtomobili və ya motosikletdən istifadə zamanı xüsusi işıq və səs siqnallarından, səsgücləndiricidən istifadə edir.

Bu tələb sürücünün aydın şəkildə görə və eşidə biləcəyi formada edilməlidir. Yol hərəkətinin tənzimlənməsi zamanı xüsusi səs siqnalları əhalinin rahatlığına və sakitliyə riayət etməklə istifadə edilməlidir.

Qayda pozuntusunun sənədləşdirilməsi

Nəqliyyat vasitəsini idarə edən şəxs yol hərəkəti qaydasını pozmuşdursa, YPX inspektoru aşağıdakıları yerinə yetirir:

  1. Qanunvericiliklə müəyyən edilmiş qaydada sənədləşmə aparır.

  2. Qayda pozuntusunun mövcudluğunu YHQ və İXM müddəaları ilə izah edir.

  3. Sürücü qayda pozuntusunu inkar edirsə, onun hüquqlarını izah edir.

Bir çox sürücülər yerində foto və ya video sübut tələb edir. Lakin qanunvericilikdə belə bir tələb nəzərdə tutulmayıb.

Qanuna əsasən sübutların təqdim edilməsi

Qanunvericiliyə görə, qayda pozuntusu xüsusi texniki vasitələrin köməyi ilə aşkar edildikdə, aşağıdakı məlumatlar sənəddə qeyd olunur:

  • Xüsusi texniki vasitələrin göstəriciləri.
  • Texniki vasitənin tipi, markası və modeli.
  • Texniki vasitənin yerləşdiyi yer.
  • Ölçmə vasitəsinin sonuncu dəfə dövlət yoxlamasından keçdiyi tarix və bu yoxlamanı təsdiq edən sənədin nömrəsi.
  • Növbəti yoxlamanın keçirilmə vaxtı.

Sürücü yerində video sübut tələb edə bilməz. Əgər sürücü protokoldan narazıdırsa, bu barədə qeydlər edə bilər. Protokol tərtib edildikdən sonra:

  • YPX əməkdaşı məlumatı aidiyyəti üzrə müvafiq DYP orqanına 1 iş günü ərzində göndərir.
  • İnzibati xəta törətmiş şəxsə işin baxılma yeri və vaxtı barədə bildiriş təqdim edilir.
  • Daha sonra, işə baxıldıqda sürücüyə foto və ya video sübutlar təqdim olunur.

Nəqliyyat vasitəsi dayandırıldıqda

Təlimatın 7.30-cu bəndinə əsasən, əgər nəqliyyat vasitəsi dayandırıldıqda:

  • Sürücünün sənədləri qaydasındadırsa,
  • Yol hərəkəti qaydasını pozmamışdırsa,

YPX inspektoru heç bir sənədləşmə aparmadan sürücüyə hərəkətini davam etdirməyə icazə verir.

Bu qaydalar həm sürücülərin hüquqlarını qorumaq, həm də yol hərəkətində qayda pozuntularını düzgün tənzimləmək məqsədi daşıyır. Qanunvericiliyə əsasən hərəkət etmək və hüquqlarınızı bilmək vacibdir.

Yenilənib: 05 Noyabr 2024 · Mənbə: AvtoStop redaksiyası